Pura vishva ek trend follow kar raha hai, jinhone population explosion ko control kar liya, wahi desh aaj garibi se bahar nikal aaye. Bharat aur South Korea ki per capita income 1961 mein lagbhag $90 thi. Aaj dono deshon ke beech zameen, aasmaan ka fark hai. South Korea ki income $34,000 hai jabki Bharat ki lagbhag $2,400. China to tab aur peeche tha, $76 ke aaspaas, aur aaj $12,500 ke kareeb pahunch gaya hai.
Bahut se reasons diye jaate hain, labor-intensive industry, education par focus, long-term economic reforms, par ek main baat chhupa di jaati hai,
Bharat ne jansankhya visfot hone diya, jabki in deshon ne ise control kar liya.
China 70 crore se 140 crore tak pahunch gaya, South Korea 2.5 crore se 5 crore (sirf double), jabki Bharat 43 crore se 145 crore (teen guna). Saari development aur economic growth jansankhya ke neeche dab gayi. Resources par pressure badhta gaya, aur long-term policy banana mushkil ho gaya.
Jati, dharm aur kshetravaad ki rajneeti haavi ho gayi, kyunki har group ne apne swarth ke hisaab se resources khinch liye. Berozgaari badhti gayi.
1950s mein civil services ki 200 seats ke liye 7,000 forms aate the, ek seat ke liye 35 log. 2024 mein 1,000 seats ke liye 13.5 lakh forms aaye, ek seat ke liye 1,350 log. Population 4 guna badhi, competition 38 guna.
Hamare talented Indian log foreign jaakar apni pratibha dikhate hain, par yahan desh ke andar talent bheed aur lines mein gum ho raha hai.
Agale 10 saal mein computerization, robots, chatbots, aur artificial intelligence ke chalte jobs aur kam hongi, lekin population badhti hi ja rahi hai. Growth rate ghatti hai, par population abhi bhi badh rahi hai.
Hal Kya Hai?
Seedha jawab hai, population control.
Desh ka bada hissa swarthi hai, kyunki is visfot ke by-product se unhe fayda mil raha hai, sasti labor, zameen ka daam badhna, share market mein growth, aur sales mein profit. Par koi nahi soch raha ke 20–30 saal baad kya hoga.
Media bhi apne fayde nuksan ke hisaab se brainwash kar raha hai. Logon ko bataya ja raha hai ke Bharat replacement rate ke kareeb hai, to 2060 tak apne aap ruk jaayegi population. Par sach yeh hai ke aisa hone nahi wala.
Kaha jaata hai, “Buzurg badhenge, bachche paida karo.” Par agar Bihar, UP, Jharkhand, Assam mein buzurg sabse kam hain, to kya yeh states ameer ho gaye? Aur jahan buzurg sabse zyada hain, Kerala, Tamil Nadu, Punjab, Andhra Pradesh, kya woh gareeb ho gaye? Bilkul nahi.
America mein har 4 working logon par 1 buzurg hai, Bharat mein 10 working par 1 buzurg. To kya hum ameer ho gaye? Nahi.
Media Aur Capitalism Ka Khel
Aaj ka normal media ho ya social media, sab advertisement se chalte hain. Advertisers hain poonjipati aur industries, unhe chahiye sasti labor aur bhar-bhar ke customers. To jiski roti khate hain, usi ka gaana gate hain.
Netaji ko bhi vote chahiye. Unhe chahiye gareeb naujawaan jo jhanda uthaye, nara lagaye, aur vote de. Isliye unke liye jansankhya visfot bura nahi, balki acha hai.
Poonjipati desh bhar mein zameen khareed rahe hain, par bech nahi rahe, supply kam kar rahe hain taaki daam badhein. Real estate, coaching institutions, aur construction sectors sabko jansankhya badhne se fayda ho raha hai.
Jo log berozgaron ke liye coaching chalate hain, woh to khushi se pagal ho rahe hain. Builders bhi chhote ghar bana-bana ke bech rahe hain. Unke liye bhi population explosion faidemand hai.
Society Ka Prabhav
Samaj ke powerful logon ko population badhne se fayda milta hai. Isliye woh aam aadmi ko bewakoof banate rehte hain. Unke apne bachche foreign universities mein padh rahe hote hain, har saal lagbhag 10 lakh students Bharat se bahar ja rahe hain.
Wahi samay mein, Bangladesh aur Rohingya se aane wale log Bharat mein basaye ja rahe hain, jo anpadh, gareeb aur subsidy par jeene wale hain. Inka kaam hai bachche paida karna aur “pani do, makan do, paisa do” kehkar jeena.
Politicians aur self-serving log inhe tool ke jaise istemal karte hain, dar aur lalach ke zariye.
Samaj Mein Dikhawa
Jo bade neta aur log jati aur dharm par bhashan dete hain, unke apne bachche English schools mein padhte hain. Doosron ke bachche religious education lekar modern yug mein piche reh jaate hain. Aise hi vote bank bante hain.
Unka lakshya simple hai, “apne vote badhao, kursi pakdo.” Society ek game ban gaya hai jahan seedha aadmi chalak aadmi ke liye kaam karta hai.
Phir kuch log kehte hain, “upar wala deta hai.” Bhai, upar wala nahi, taxpayers dete hain. Har GST, income tax, corporate tax, aur loan se khazana bhar raha hai.
Agar ek gareeb parivaar 8 bachche paida karta hai, to sarkar ko har mahine us parivaar ko ration, pension, mid-day meal, janani suraksha, free dawa aur ghar dene padte hain. Yeh sab public ke paison se hota hai.
Jansankhya Law Ki Zarurat
Middle-class aur educated logon ne family planning follow kiya, ek ya do bachche, phir full stop. Par agar desh mein population law nahi aaya, to yeh unke liye bhi galti sabit ho sakti hai.
Problem un logon se hai jo sirf subsidy aur free facilities par jee rahe hain, bina desh ke vikas ya tax collection mein yogdaan diye. Har dharm mein aise log hain.
Desh ek ghar ki tarah hai, kamane wale kam ho rahe, khane wale badh rahe. Fir us ghar ka bhavishya kya hoga?
Isi liye do bachchon ka kanoon bahut zaruri hai. Pollution, corruption, aur resource shortage sab jansankhya visfot ke side effects hain.
Reality Of Limited Resources
Kuch log kehte hain, “population acchi hai, asset hai.” Par sabko education, job, aur makan dene ke liye paisa kahan se aayega? Har sarkar ke paas limited resources hain. Agar ek jagah kharch karoge, to doosri jagah rukega.
Zyada paisa chhapa to inflation badhega, zyada loan liya to interest badhega. Simple truth, resources limited hain.
Solution sirf ek hai, do bachchon ka sakht kanoon.
Political Aur Social Reality
World kahaniyon par chalta hai, communism, capitalism, market-ism. Aaj market-driven narrative hai, “zyada log = zyada economic growth.”
Yeh kahani western countries ne banayi aur hamare swarthi logon ne use apna liya. Poor aur less-educated log samajh nahi paaye, aur 5% chalak log unhe manipulate kar rahe hain, kabhi jati ke issue mein, kabhi dharm ke chakkar mein.
Reality yeh hai ki Bharat ki garibi ka sabse bada reason jansankhya visfot hai.
Democracy ke teen pillars, rule of law, freedom of speech, aur jiska jitna number, uski utni hissedari. Iska misuse ho raha hai.
Gareeb logon ko samjha diya gaya hai, “Yeh zindagi kuch nahi hai, bachche paida karo, marne ke baad sab milega.” Par yeh bolne wale apna ghar, gaadi, paisa kabhi nahi baantte.
Ek Ghar Ka Udaharan
Maan lo do bhai hain, bada bhai 10 bachche paida karta hai, chhota bhai ek. Dono ke paas limited resources hain. Zyada bachchon wale ke liye har jagah jagah kam pad jaati hai. Jahan public place ho, uske bachche occupy kar lete hain.
TV par kya chalega, vote kis taraf jaayega, majority decide karti hai. Aur yeh hi jansankhya visfot ka effect hai.
Jab resources limited hote hain, to ladaiyan badhti hain. Court mein cases badhte hain, par judge kam hote hain. Justice delayed, aur kanoon ka darr khatam hota jaata hai.
Bhavishya Ki Tasveer
Agar population control nahi hua, to har family aur dharm mein competition hoga, kaun zyada bachche paida kare. Society apni security ke liye numbers badhane lagegi.
Tab desh “Sone Ki Chidiya” banne ke bajay aur peeche chala jaayega.
Isi liye Bharat ke liye do bachchon ka law bahut zaruri hai. Agar aisa kanoon ab nahi bana, to future bhayankar ho sakta hai.
Middle-class sochta rahega, “maine to control kiya, par doosre nahi kar rahe.” Fir woh bhi kahega, “main bhi paanch kar leta hoon.”
Agar hum sab milkar samjhein, Hindu, Muslim, Sikh, Christian sab, to do bachchon ka law ham sabki khushhali ki shuruaat ho sakta hai.
