Har online platform chahta hai ki aap us par bane rahein lagataar. Algorithms yeh jaan lete hain ki aapko kya pasand hai, kya naapasand hai, kis se darr lagta hai, kya search karte hain, kya like karte hain. Aapke IP address, login aur IMEI se woh aapko ek loop mein daal dete hain.
Agar aapko lagta hai ki Russia-Ukraine war mein Russia ki galti hai, toh aapke feed mein sirf wahi clips, articles, blogs aur podcasts dikhenge jo aapke soch ko confirm karein. Dusra side aapse chhupa liya jaata hai.
Yahi hota hai confirmation bias, woh tendency jahan hum sirf wahi information dhundte hain jo hamari existing beliefs ko support kare, aur baaki sab ignore kar dete hain.
Algorithm isi bias ko aur mazboot karta hai. Content creators bhi isi loop mein hain, agar aapko koi neta pasand nahi hai, toh unke videos baar-baar aapke saamne aayenge, aur aap us YouTuber ke “fan” ban jaoge. Fir aap apni soch wale logon ko forward karte ho, aur woh bhi isi bias loop mein fas jaate hain.
Aise mein aapko lagta hai, “Hamari soch hi sahi hai, dusre sab galat hain.”
Isi tarah social media dheere-dheere aapke mind ko control karne lagta hai.
Social media par sach aur jhooth ka farq dhundhna mushkil hota ja raha hai. Paid content, fake accounts, bots aur AI-generated jhooth ne internet ko ek battlefield bana diya hai, jahaan aapke opinions ko paisa aur propaganda ke zariye shape kiya jaata hai.
Aapko lagta hai 1000 likes ka matlab hai sach, par zaroori nahi. Har ek share, like aur comment ke peeche ek agenda ho sakta hai.
Isiliye, samajhna zaroori hai ki social media ek powerful tool hai, par agar hum savdhaan nahi rahe, toh yeh hamare dimaag ko reprogram kar dega. Har reel, har post, har trending topic aapke sochne ke tarike ko subtly badal raha hai.
Aaj ka time hai dopamine culture ka, jahaan chhoti-chhoti reels aur flashy videos hume instant khushi dete hain, par hamari concentration power ko dheere-dheere khatam kar rahe hain.
Social media se door bhaagna zaroori nahi hai, par soch samajh kar use karna bahut zaroori hai. Nahi toh, jaise author ne kaha, “System aapse kaam le lega, aur aapko pata bhi nahi chalega.”
